Orta statistik internet istifadəçisi bir ay ərzində 85 sayta daxil olur, lakin istifadəçilər tərəfindən sevimli və gündəlik daxil olunan saytların sayı orta hesabla bir yarım təşkil edir. Bu barədə Yahoo!, ComScore və Media Contacts tərəfindən keçirilmiş birgə araşdırmada qeyd olunur. Həmin nəticələr 12 milyon istifadəçi tərəfindən saytlara daxil olmanın təhlilini apardıqdan və daha 800 istifadəçi arasında aparılmış sorğudan sonra əldə edilib.
Bundan əlavə tədqiqatçılar müəyyən ediblər ki, istifadəçilər özlərinin sevimli bir yarım saytlarına orta hesabla 4 il 6 ay ərzində daxil olurlar. Bu cür saytlarda onlar internetdə olan vaxtlarının üçdə bir hissəsini keçirirlər. Digər saytlara nisbətən insanlar sevimli resurslarına daxil olarkən 13% daha çox reklama diqqət ayırırlar. İstifadəçilər hesab edirlər ki, sevimli saytda düzgün məlumatı əldə etmək imkanı digər saytlara nisbətən üç dəfə çoxdur. Bu barədə Lenta yazır.